Ordliste frå bokmål til nynorsk

Nedanfor kan du finne ei liste med dei mest frekvente para av bokmåls- og nynorskformer frå dialektkorpusa til Tekstlaboratoriet (Nordisk dialektkorpus og LIA-korpuset).

Bruk Ctrl-f og søk på dei ordformene du er interessert i, eller bla deg igjennom lista. Ordlista er sortert etter frekvens og viser alle ordformer med høgare frekvens enn 3. Ord som vi ikkje finn i Nynorskordboka eller Bokmålsordboka, er merkte med koden "+x".

Orda i ordlistene kjem frå gamle dialektopptak frå Målførearkivet ved Universitetet i Oslo. Dei vart først transkriberte på bokmål. I LIA-prosjektet vart bokmålstranskripsjonane translittererte til nynorsk, og ordpara nedanfor er eit resultat av denne prosessen. Vi har valt dei nynorskformene som ligg nærast opptil bokmålsnorma. Dermed vil ein i nynorskdelen av lista finne til dømes ”ønske”, men ikkje ”ønskje” eller ”ynskje”.

I opptaka snakkar folk om svært ulike emne, til dømes om det gamle arbeidslivet, kystkulturen, jordbruket og andre tema frå by og bygd. Ordutvalet i listene varierer difor frå stad til stad. Likevel har alle opptaka med dei vanlegaste orda i språket, slike som ”eg”, ”vere”, ”vart”, ”er”, og ”ikkje”. Det er ikkje sikkert at alle bøyingsformene er med for kvart ord. Listene er automatisk genererte og er ikkje korrekturlesne. Meld frå om eventuelle feil til: tekstlab-post@iln.uio.no

Ordlista er eit bonusprodukt frå det store LIA-prosjektet, som utviklar forskingsverktøy og dialektmateriale for språkforskarar. Les meir om LIA-prosjektet her eller søk i dialektordlister her. LIA er er eit infrastrukturprosjekt finansiert av Forskingsrådet.